ఫుల్‌ డిమాండ్‌

డొనాల్డ్‌ ట్రంప్‌ చిత్రంతో ఉన్న ఈ గోల్డ్ కార్డును 5 మిలియన్‌ డాలర్లతో ఎవరైనా సొంతం చేసుకోవచ్చని ట్రంప్‌ పేర్కొన్నారు. దీన్ని తానే మొదట కొనుగోలు చేసినట్లు ఆయన ప్రకటించారు. అయితే రెండోది ఎవరు కొంటారనేది తనకు తెలియదన్నారు. ఈ గోల్డ్‌ కార్డ్‌ రెండు వారాల్లో అమ్ముడయిపోతుందని ఆయన ఆశాభావం వ్యక్తంచేశారు.

నేరుగా అమెరికా పౌరసత్వం!

ఈబీ-5 (ఇన్వెస్టర్ వీసా) విధానాన్ని రద్దు చేసి రూ.43.5 కోట్లు (50 లక్షల డాలర్లు) వెచ్చించేవారికి ఈ గోల్డ్‌ కార్డు అందిస్తామని ఇటీవల ట్రంప్‌ ప్రకటించారు. దీన్ని కొనుగోలు చేసినవారికి నేరుగా అమెరికా పౌరసత్వాన్ని అందజేస్తామని అన్నారు. ప్రపంచవ్యాప్తంగా సంపన్నులను ఆకర్షించేందుకే దీనిని ప్రవేశపెట్టామని, వారు అమెరికాకు వచ్చి భారీగా ఖర్చు పెడితే స్థానికంగా ఉద్యోగాలు పెరుగుతాయని ట్రంప్‌ అంటున్నారు. ఈ కార్డుకు భారీగా గిరాకీ వచ్చిందని, ఒక్కరోజే 1000 గోల్డ్‌ కార్డులను విక్రయించినట్లు వాణిజ్యశాఖ మంత్రి హోవర్డ్‌ లుట్నిక్‌ తెలిపారు. వీటి ద్వారా 5 బిలియన్‌ డాలర్లు సేకరించామని ఆయన చెప్పారు. ప్రపంచవ్యాప్తంగా 3.7 కోట్ల మందికి ఈ గోల్డ్‌ కార్డు కొనే సామర్థ్యం ఉందని అన్నారు. ఈబీ-5 ప్రోగ్రామ్‌ వల్ల జరుగుతున్న మోసాలు, ఇతర అక్రమాలను అరికట్టేందుకే వీటిని తీసుకొస్తున్నట్లు ఆయన తెలిపారు. చట్టబద్ధ ఇన్వెస్టర్లకు పౌరసత్వం, శాశ్వత నివాసం కల్పించేందుకు ఈ గోల్డ్ కార్డ్‌ ఉపయోగపడుతుందన్నారు.