Category : | Sub Category : రాజకీయం Posted on 2024-07-31 10:42:44
రాజధాని అమరావతి అభివృద్ధిని పరుగులు పెట్టించేందుకు వేగంగా అడుగులు వేస్తున్న రాష్ట్రప్రభుత్వం...అమరావతి ఇన్నర్ రింగ్ రోడ్డు (ఐఆర్ఆర్) ప్రతిపాదనను పరిశీలిస్తోంది. జగన్ ప్రభుత్వ నిర్వాకంతో ఆగిపోయిన రాజధాని నిర్మాణ పనులు, ప్రాజెక్టులను వీలైనంత త్వరగా పట్టాలెక్కించేందుకు కసరత్తు చేస్తున్న ప్రభుత్వం దానిలో భాగంగా ఐఆర్ఆర్ ప్రతిపాదననూ తెరపైకి తెచ్చింది. విజయవాడ తూర్పు బైపాస్ కి ఎడంగా, కనీసం 20 కి.మీ. దూరం నుంచి ఐఆర్ఆర్ వెళ్లేలా ఎలైన్మెంట్ సిద్ధం చేయనుంది. దీనికి భూమిని భూసమీకరణ విధానంలో తీసుకోవాలని యోచిస్తోంది. గతంలో తెదేపా హయాంలో సుమారు 180 కి.మీ. పొడవైన అమరావతి అవుటర్ రింగ్ రోడ్ ( ఓఆర్ఆర్)తో పాటు, సుమారు 97.5 కి.మీ. పొడవైన అమరావతి ఐఆర్ఆర్ నిర్మాణానికి ప్రతిపాదనలు సిద్ధం చేశారు. అమరావతి, విజయవాడ నగరాల చుట్టూ నిర్మిస్తూ.. తాడేపల్లి, మంగళగిరిలతో పాటు, ఉమ్మడి, కృష్ణా, గుంటూరు జిల్లాల పరిధిలోని పలు గ్రామాలు ఐఆర్ఆర్ లోపలికి వచ్చేలా ప్రతిపాదనలు సిద్ధమయ్యాయి.
2019లో అధికారంలోకి వచ్చిన జగన్ ప్రభుత్వం అమరావతి నిర్మాణ పనులు నిలిపివేయడంతో పాటు, ఓఆర్ఆర్, ఐఆర్ఆర్ ప్రతిపాదనల్ని పూర్తిగా అటకెక్కించింది. ఇప్పుడు విజయవాడ పశ్చిమ బైపాస్ నిర్మాణం శరవేగంగా జరుగుతుండటం, తూర్పు బైపాస్ కూడా నిర్మిస్తే అది ఒక రింగ్ రోడ్డులా ఏర్పడుతుంది కాబట్టి.. ప్రస్తుతానికి అమరావతికి ఐఆర్ఆర్ ప్రతిపాదన పక్కన పెట్టాలని రాష్ట్రప్రభుత్వం మొదట అనుకుంది. కానీ రాబోయే రోజుల్లో అమరావతి, విజయవాడ, గుంటూరు నగరాలు, మంగళగిరి, తాడేపల్లి పట్టణాలు కలిసిపోయి... మహానగరంగా అభివృద్ధి చెందే అవకాశం ఉండడం, అమరావతి, విజయవాడ చుట్టుపక్కల ప్రాంతాలు శరవేగంగా అభివృద్ధి చెందుతుండడంతో ఐఆర్ఆర్ కూడా అవసరమేనని సూత్రప్రాయంగా నిర్ణయించింది.
