Category : | Sub Category : రాజకీయం Posted on 2024-09-13 13:11:52

జగన్ హయాంలో భారీ కుంభకోణం వైకాపా పెద్దల దోపిడీకి వెన్నుదన్నుగా గనుల శాఖ పూర్వ డైరెక్టర్ వీజీ వెంకటరెడ్డి జేపీవీఎల్, జీసీకేసీ, ప్రతిమ సంస్థలతో పాటు మరికొందరు వ్యక్తులకు అనుచిత లబ్ధి ఏసీబీ ప్రాథమిక విచారణలో గుర్తింపు.. ఆధారాలు లభ్యం వెంకటరెడ్డితో పాటు గుత్తేదారు సంస్థలపై కేసు నమోదు నిందితుల నివాసాలు, కార్యాలయాల్లో సోదాలు

జగన్ హయాంలో గత ఐదేళ్లలో ఇసుక విధానం ముసుగులో ఏకంగా రూ.2,566 కోట్లు దోచేశారు. నాటి వైకాపా పెద్దల దోపిడీకి గనుల శాఖ పూర్వ డైరెక్టర్ వీజీ వెంకటరెడ్డి అన్నీ తానై సహకరించారు. ఇసుక గుత్తేదారు సంస్థలైన జేపీవీఎల్, జీసీకేసీ, ప్రతిమ సంస్థలు, మరికొందరు వ్యక్తులతో కలిసి రూ.వేల కోట్లు కొల్లగొట్టేందుకు నేరపూరిత కుట్రకు పాల్పడ్డారు. ఇసుక తవ్వకాల్లో గుత్తేదారు సంస్థలు యథేచ్ఛగా ఉల్లంఘనలకు పాల్పడినా వాటికి వెన్నుదన్నుగా నిలిచారు. ప్రభుత్వానికి బకాయిపడ్డ సొమ్ములు చెల్లించకుండానే ఆయా సంస్థలు సమర్పించిన బ్యాంకు గ్యారెంటీలను వారికి వెనక్కి ఇచ్చేశారు. సుప్రీంకోర్టు, జాతీయ హరిత ట్రైబ్యునల్ ఆదేశాలను బేఖాతరు చేసి తప్పుడు అఫిడవిట్లు సమర్పించారు. టెండర్లు, ఒప్పందాలు, ఏపీఎంఎంసీ నిబంధనలు, ఆపరేషన్స్, ఇసుక తవ్వకాల్లో పెద్ద ఎత్తున ఉల్లంఘనలకు పాల్పడ్డారు. అవినీతి నిరోధక శాఖ (ఏసీబీ) గత నెల రోజులుగా చేపట్టిన ప్రాథమిక విచారణలో ఈ కుంభకోణానికి సంబంధించిన ఈ కీలక అంశాలు, ఆధారాలు బయటపడ్డాయి. దీంతో వీజీ వెంకటరెడ్డిపై బుధవారం ఏసీబీ కేసు నమోదు చేసింది. జేపీవీఎల్, జీసీకేసీ, ప్రతిమ సంస్థలను, వాటి ప్రతినిధులను నిందితులుగా చేర్చింది. అవినీతి నిరోధక చట్టం, మైన్స్ అండ్ మినరల్స్ చట్టంలోని సెక్షన్లతో పాటు ఐపీసీలోని నేరపూరిత విశ్వాస ఘాతుకం, నేరపూరిత కుట్ర తదితర సెక్షన్ల కింద కేసు నమోదు చేసింది. దర్యాప్తులో భాగంగా ఆయా సంస్థల కార్యాలయాలు, వీజీ వెంకటరెడ్డి, ఇతర నిందితుల ఇళ్లల్లో గురువారం సోదాలు నిర్వహించింది. గత రెండు నెలలుగా పరారీలో ఉన్న వెంకటరెడ్డి ఆచూకీ కోసం ఆరా తీస్తోంది.