Category : సినిమా | Sub Category : సినిమా Posted on 2025-01-11 11:51:51
తెలుగు వెబ్ మీడియా న్యూస్: గ్లోబల్ స్టార్ రామ్ చరణ్ ప్రధాన పాత్రలో నటించిన లేటేస్ట్ మూవీ గేమ్ ఛేంజర్. డైరెక్టర్ శంక్ర దర్శకత్వం వహించిన ఈ పొలిటికల్ యాక్షన్ డ్రామాలో అంజలి, కియారా అద్వానీ, శ్రీకాంత్, ఎస్ జే సూర్య కీలకపాత్రలు పోషించగా.. నిర్మాత దిల్ రాజ్ భారీ బడ్జెట్ తో నిర్మించారు. ఇందులో చరణ్ ద్విపాత్రాభినయం చేసిన సంగతి తెలిసిందే. ముఖ్యంగా అప్పన్న పాత్రలో అద్భుతమైన నటనతో జీవించారు. భారీ అంచనాల మధ్య సంక్రాంతి కానుకగా జనవరి 10న విడుదలైన ఈ సినిమా తొలి రోజు రూ.186 కోట్లు గ్రాస్ రాబట్టింది. ఈ విషయాన్ని చిత్రయూనిట్ అధికారికంగా ప్రకటించింది. ఇది గేమ్ ఛేంజింగ్ బ్లాక్ బస్టర్ అంటూ పోస్టర్ రిలీజ్ చేసింది. ఇక ప్రముఖ టికెట్ బుకింగ్ ప్లాట్ ఫామ్ బుక్ పై షోలో గేమ్ చేంజర్ కు తొలి రోజు 1.3 మిలియన్లకు పైగా టికెట్స్ అమ్ముడైనట్లు సంస్థ వెల్లడించింది. ఎన్టీఆర్ దేవరకు తొలి రోజు రూ.172 కోట్లు గ్రాస్ రాగా, అల్లు అర్జున్ ‘పుష్ప-2’కు రూ.294 కోట్లు గ్రాస్ వచ్చాయి.
గేమ్ ఛేంజర్ సినిమాకు వారాంతంలో ఈ టికెట్ అమ్మకాలు పెరిగే అవకాశం ఉందని అభిమానులు ఆశిస్తున్నారు. ఈ సినిమాలో అప్పన్న పాత్రలో రామ్ చరణ్ నటనపై సోషల్ మీడియాలో ప్రశంసలు వస్తున్నాయి. అప్పన్న, రామ్ నందన్ పాత్రలకుగానూ చరణ్ పై కురిపిస్తున్న ప్రశంసలను చూస్తుండడం సంతోషంగా ఉంది. ఎస్జే సూర్య, కియారా అద్వానీ, అంజలి, నిర్మాత దిల్ రాజ్, దర్శకుడు శంకర్ కు హృదయపూర్వక శుభాకాంక్షలు అంటూ మెగాస్టార్ చిరంజీవి ట్వీట్ చేశారు.
“కంగ్రాట్స్ డియర్ హస్బెండ్. ప్రతి విషయంలో నువ్వు నిజంగానే ఒక గేమ్ ఛేంజర్. లవ్ యూ” అంటూ ఉపాసన పోస్ట్ చేసింది. అప్పన్న పాత్రలో అద్భుతంగా నటించావు అనడంలో ఎలాంటి సందేహం లేదు. ఆ పాత్రకు ప్రాణం పోశావు. నీ ప్రదర్శన చూస్తుంటే ఒక కలలా అనిపించింది. పూర్తిస్థాయి పరిణతి చెందిన నటుడిగా ఎదిగావు ” అంటూ సాయి దుర్గాతేజ్ పోస్ట్ చేశారు.
