మంత్రి నాదెండ్ల మనోహర్: మే నుంచి స్మార్ట్‌ రేషన్‌ కార్డులు

Category : ఆంధ్రప్రదేశ్ | Sub Category : రాష్ట్ర వార్తలు Posted on 2025-04-02 10:07:29

తెలుగు వెబ్ మీడియా న్యూస్:- ఏటీఎం సైజులో కొత్త రేషన్‌ కార్డులు మంజూరు చేస్తామని పౌరసరఫరాల శాఖ మంత్రి నాదెండ్ల మనోహర్‌ తెలిపారు. ఏప్రిల్‌ 30తో ఈ-కేవైసీ ప్రక్రియ పూర్తయిన వెంటనే.. సీఎం చంద్రబాబు ఆమోదంతో ప్రస్తుతం ఉన్న కార్డుల స్థానంలో వీటి జారీ చేపడుతామని పేర్కొన్నారు. ఇందులో క్యూఆర్‌ కోడ్‌ వంటి భద్రతా ఫీచర్లు ఉంటాయన్నారు. సచివాలయంలో మంగళవారం మంత్రి మనోహర్‌ మీడియాతో మాట్లాడారు. ప్రస్తుతం ఉన్న ఫ్యామిలీ రేషన్‌ కార్డునే సైజు తగ్గించి అన్ని వివరాలతో కొత్త కార్డులు జారీ చేస్తామన్నారు. కొత్త కార్డుల జారీ సమయంలోనే కుటుంబసభ్యుల జోడింపు, తొలగింపు, స్ప్లిట్‌ కార్డుల కోసం ఆప్షన్లు ఇస్తామని పేర్కొన్నారు. గత ప్రభుత్వంలోలా ఎక్కడా వ్యక్తుల చిత్రాలు కార్డులపై ఉండబోవని స్పష్టం చేశారు. ఈ-కేవైసీ పూర్తయిన తర్వాత ఎంత మందికి కొత్త కార్డులు ఇవ్వాలనే దానిపై స్పష్టత వస్తుందన్నారు. మరోవైపు రేషన్‌ బియ్యం అక్రమ రవాణాపై ఉక్కుపాదం మోపుతున్నామని, బాధ్యులపై పీడీ చట్టం ప్రకారం కఠిన చర్యలు తీసుకోవడమే కాకుండా వాహనాలను సీజ్‌ చేస్తున్నామని మంత్రి తెలిపారు. గత ప్రభుత్వం రూ.1,600 కోట్లతో ఎండీయూ వాహనాలను కొనుగోలు చేసి దుర్వినియోగం చేసిందని, ఇది పెద్ద కుంభకోణమని, దీనిపై విచారణ జరుగుతోందని, త్వరలోనే ఒక నిర్ణయం ప్రకటిస్తామని మనోహర్‌ తెలిపారు. కొన్ని వాహనాలు కనబడకపోగా, మరికొన్ని పనిచేయడం లేదన్నారు. అప్పుడున్న ప్రమాణాల ప్రకారం వీటి కొనుగోలు జరగలేదన్నారు.

బియ్యం ఎగుమతుల నిబంధనలను కేంద్రం సరళతరం చేయడం వల్ల.. తెలంగాణ ప్రభుత్వం కాకినాడ పోర్టు నుంచి 1.50 లక్షల టన్నుల బియ్యాన్ని ఎగుమతి చేస్తుందన్నారు. గత ప్రభుత్వం సన్న బియ్యం ఇస్తామని మోసం చేసిందని విమర్శించారు. మధ్యాహ్న భోజన పథకం కింద వచ్చే విద్యా సంవత్సరం నుంచి 44,394 ప్రభుత్వ పాఠశాలలు, 3,938 వసతి గృహాలకు నాణ్యమైన సన్నబియ్యాన్ని ప్రత్యేక ప్యాకింగ్‌తో ప్రతి నెలా పంపిణీ చేసే ఏర్పాట్లు చేస్తున్నామని, 5 గోదాములు ఏర్పాటు చేశామని తెలిపారు.

24 గంటల్లోనే రైతులకు డబ్బులు జమ

ఈ రబీ సీజన్‌లో 10 లక్షల టన్నుల ధాన్యాన్ని కొనుగోలు చేయాలనే లక్ష్యాన్ని నిర్దేశించుకున్నామని మంత్రి పేర్కొన్నారు. ఇందు కోసం 2,900 రైతు సహాయ కేంద్రాలను ఏర్పాటు చేశామన్నారు. ఖరీ్‌ఫలో 35,93,443 టన్నుల ధాన్యం కోనుగోలు చేశామని, 24 గంటల్లోనే రూ.8,279 కోట్లను రైతుల ఖాతాల్లో జమ చేశామని తెలిపారు. దేశంలోనే మొదటిసారిగా రైతులు వాట్సాప్‌ ద్వారా ధాన్యం అమ్ముకునే అవకాశం కల్పించామన్నారు. 16 వేల మంది వాట్సాప్‌ ద్వారా తమకు నచ్చిన మిల్లుల్లో ధాన్యం విక్రయించుకున్నారని వివరించారు. గత ఖరీఫ్‌ సీజన్‌లో గత ప్రభుత్వ హయాంలో 29 లక్షల టన్నుల ధాన్యం మాత్రమే కొనుగోలు చేశారన్నారు. గతంతో పోలిస్తే తమ ప్రభుత్వం 20 శాతం ఎక్కువగా ధాన్యాన్ని కొనుగోలు చేసిందని తెలిపారు. ఖరీఫ్‌ ధాన్యం రైతుల వద్ద కుప్పల మీద ఉంటే కొనుగోలు చేస్తామని మంత్రి పేర్కొన్నారు. గత ప్రభుత్వం 4.95 లక్షల మంది రైతుల వద్ద ధాన్యం కొనుగోలు చేస్తే.. తమ ప్రభుత్వం నేటికి 5.60 లక్షల మంది రైతుల వద్ద ధాన్యాన్ని కొనుగోలు చేసిందన్నారు. 2023, 2024లలో వైసీపీ ప్రభుత్వం నెల్లూరు జిల్లాల్లో ఒక్క బస్తా ధాన్యం కొనుగోలు చేయలేదని, తమ ప్రభుత్వం నేటికి నెల్లూరు జిల్లాలో 75,410 టన్నుల ధాన్యాన్ని కొనుగోలు చేసిందన్నారు.

పల్నాడు జిల్లాల్లో గతంలో 60 టన్నులు కొనుగోలు చేస్తే.. ప్రస్తుతం 14 వేల టన్నులు కొనుగోలు చేశామని, అదేవిధంగా కృష్ణాలో 23 శాతం, గుంటూరులో 639 శాతం, బాపట్లలో 213 శాతం అధికంగా ధాన్యాన్ని కొనుగోలు చేశామని మంత్రి తెలిపారు.

రెండో విడత దీపం-2 అమలు ప్రారంభం

కోటి మంది లబ్ధిదారులు దాటే విధంగా రెండో విడత దీపం-2 పథకాన్ని మంగళవారం నుంచి ప్రారంభించామని మంత్రి మనోహర్‌ తెలిపారు. మొదటి విడతలో 99.03 లక్షల మంది సద్వినియోగం చేసుకున్నారని, లబ్ధిదారుల ఖాతాల్లో రూ.760 కోట్లు నేరుగా జమ చేశామని పేర్కొన్నారు. ఈ మూడు నెలల్లో అదనంగా 2 లక్షల గ్యాస్‌ కనెక్షన్లు నమోదయ్యాయని తెలిపారు. ఈ-కేవైసీ అర్హత విషయంలో ఎలాంటి సమస్యలు ఎదురైనా.. వాట్సాప్‌, ఆన్‌లైన్‌ ద్వారా నివృత్తి చేసుకొనే వెసులుబాటు కల్పించామన్నారు.