Category : అంతర్జాతీయ | Sub Category : వార్తలు Posted on 2024-11-14 13:17:15
TWM News:-బ్రిటిష్ ఎయిర్ లైన్స్ వారు భారతీయులను ఆకట్టుకునేందుకు ఇచ్చిన ప్రకటన నేటికీ ఆదరణ పొందుతూనే ఉంది. ఇప్పుడు అదే బాటలో మన పొరుగు దేశమైన శ్రీలంక ఎయిర్‌లైన్స్ నడుస్తోంది. తాజాగా భారతీయులను ఆకట్టుకునేందుకు మాత్రమే కాదు.. రామాయణానికి శ్రీలంక కు ఉన్న సంబంధాన్ని గుర్తు చేసే విధంగా \'రామాయణం\' నేపథ్య ప్రకటనను రూపొందించింది. ఈ 5 నిమిషాల ప్రకటనలో రామాయణానికి సంబంధించిన ప్రదేశాలను సజీవంగా ప్రదర్శించారు
ప్రస్తుతం సోషల్ మీడియాలో శ్రీలంకన్ ఎయిర్‌లైన్స్ కి సంబంధించిన ఒక ప్రకటన బాగా ప్రాచుర్యం పొందింది. విశేషమేమిటంటే హిందువు ఆరాధ్య దైవం శ్రీరాముడు.. రామాయణంతో దీనికి ప్రత్యేక అనుబంధం ఉంది. రామాయణం ఇతివృత్తంతో చిత్రీకరించిన ఈ ప్రకటన ఇంటర్నెట్‌లో హల్ చల్ చేస్తోంది. ఈ యాడ్ విపరీతంగా ప్రశంసలు అందుకుంటుంది. ఇందులో శ్రీలంకలోని చారిత్రక, పౌరాణిక ప్రదేశాలను ప్రదర్శించి భారతీయ పర్యాటకులను ఆకర్షించే ప్రయత్నం చేసింది.
విమానయాన సంస్థ తన ప్రకటనల ద్వారా రామాయణానికి సంబంధించిన ప్రదేశాలను సజీవంగా ప్రదర్శించింది. ఇందులో రాముడు, రావణుడు, హనుమంతునికి సంబంధించిన కథలు చిత్రీకరించబడ్డాయి. ప్రకటన ద్వారా మతపరమైన, సాంస్కృతిక ప్రదేశాలను మాత్రమే కాదు ఆ దేశంలో అందమైన ప్రదేశాలను చూపిస్తూ శ్రీలంక పర్యాటక రంగాన్ని కూడా ప్రదర్శించబడింది.
