సౌత్ ఇండస్ట్రీలో కమల్ హాసన్ కు మంచి ఫ్యాన్ ఫాలోయింగ్ ఉంది. తెలుగు, తమిళంలో ఆయనకు విపరీతమైన క్రేజ్ ఉంది. ఇప్పటివరకు ఎన్నో సూపర్ హిట్ చిత్రాల్లో నటించి మెప్పించారు. ప్రస్తుతం థగ్ లైఫ్ చిత్రంలో నటిస్తున్నారు. ఇదిలా ఉంటే తాజాగా కమల్ హాసన్ తన అభిమానులకు షాకింగ్ ప్రకటన విడుదల చేశారు. తను చేసే పనిని మెచ్చి ఉలగనాయగన్ వంటి ఎన్నో బిరుదులు ఇచ్చారని.. ఇకపై తనను అలా బిరుదులతో పిలవకూడదని అన్నారు. కళ కంటే కళా కారుడు గొప్ప కాదు అన్న తన అభిప్రాయమని.. తాను ఎప్పటికీ స్థిరంగానే ఉండాలనుకున్నానని చెప్పుకొచ్చాడు. నటుడిగా తన కర్తవ్యాన్ని నిర్వహించాలనుకుంటున్నానని.. అందుకే తనకు స్టార్ ట్యాగ్స్ వద్దని అన్నారు. అయితే ఇలా ట్యాగ్స్ తొలగించడం ఇండస్ట్రీలో మొదటిసారి కాదు. గతంలోనూ పలువురు స్టార్స్ ఇలా తమ ట్యాగ్స్ తొలగించారు.

2021లో కోలీవుడ్ హీరో అజిత్ కుమార్ హఠాత్తుగా ఓ ప్రకటన విడుదల చేశారు. ఇక నుంచి తనను వేరే టైటిల్స్ పెట్టి పిలవవద్దని అభిమానులకు చెప్పాడు. భవిష్యత్తులో తన గురించి రాసేటప్పుడు అజిత్ కుమార్, అజిత్ లేదా ఎ.కె. అని సూచిస్తే సరిపోతుందని అన్నారు. దీంతో అప్పట్లో అజిత్ ప్రకటన ఇండస్ట్రీలో పెను ప్రకంపనలు సృష్టించింది. త‌లా, అల్టిమేట్ స్టార్, మిర‌ట్ట‌ల్ నాయ‌గ‌న్ వంటి ట్యాగ్స్ ఉండేవి.

ఇక ఇప్పుడు కమల్ హాసన్ కూడా తన స్టార్ ట్యాగ్స్ తిరస్కరించారు. అయితే ఇప్పుడు కమల్ ఇలాంటి నిర్ణయం తీసుకోవడానికి కారణమేంటీ అంటూ నెట్టింట ఆరా తీస్తున్నారు ఫ్యాన్స్. ప్రస్తుతం సోషల్ మీడియా ప్రపంచంలో ఫ్యాన్స్ వార్ ఎక్కువగా జరుగుతుంది. అందుకే అభిమానుల మధ్య మనస్పర్థలు, గొడవలు తగ్గించేందుకు ఇలాంటి చిన్న చిన్న నిర్ణయాలు తప్పవని తెలుస్తోంది.