Category : క్రీడలు | Sub Category : జాతీయ Posted on 2024-11-11 11:08:39
TWM News:భారత మహిళల హాకీ జట్టుకు సవాల్! ఆసియా చాంపియన్స్ ట్రోఫీలో టైటిల్ నిలబెట్టుకోవాలనే లక్ష్యంతో బరిలో దిగుతున్న సలీమా బృందం.. సోమవారం తొలి మ్యాచ్లో మలేసియాతో తలపడనుంది. పారిస్ ఒలింపిక్స్కు అర్హత సాధించడంలో విఫలమైన భారత్..ఈ ఏడాది హాకీ ప్రొ లీగ్ లో 16 మ్యాచ్ల్లో 13 ఓడిపోయింది. ఈ నేపథ్యంలో ఆసియా చాంపియన్స్ ట్రోఫీతోనైనా విజయబాట పట్టాలని సంకల్పంతో ఉంది. కానీ ప్రస్తుతం ఉన్న ఫామ్లో ఆసియా టైటిల్ నిలబెట్టుకోవడం భారత జట్టుకు పెద్ద పరీక్షే. ఒలింపిక్ రజత పతక విజేత చైనా, జపాన్, కొరియా, మలేసియా, థాయ్లాండ్ లాంటి బలమైన జట్లు ఈ టోర్నీ బరిలో ఉన్నాయి. 2016లో తొలిసారి ఆసియా టైటిల్ సాధించిన భారత్.. చాలా ఏళ్ల విరామం తర్వాత 2023లో మళ్లీ ట్రోఫీ నెగ్గింది. \"పారిస్ ఒలింపిక్స్క అర్హత సాధించకపోవడం తీవ్ర నిరాశను కలిగించింది. ఈ విషయాన్ని మరిచిపోయి ముందుకెళ్లడం ముఖ్యం. మళ్లీ మొదటి నుంచి మొదలుపెట్టాలి. ఫిట్నెస్ విషయంలో మెరుగుపడాలి\" అని కెప్టెన్ సలీమా టెట్ చెప్పింది.
