Category : నేర | Sub Category : జాతీయ Posted on 2024-11-09 12:41:15
TWM News:ఛత్తీస్ గఢ్ లోని బీజాపూర్ జిల్లా పామేడు పోలీసు స్టేషన్ పరిధిలోని రేఖపల్లి అడవుల్లో శుక్రవారం భద్రతాబలగాలు, మావోయిస్టుల మధ్య ఎదురుకాల్పులు చోటుచేసుకున్నాయి. ఈ ఎదురుకాల్పుల్లో ముగ్గురు మావోయిస్టులు మృతి చెందారు. ఊసూరు, బాసగూడ, పామేడు, తర్రెం అడవుల్లో మావోయిస్టులు ఉన్నారనే సమాచారంతో డీఆర్(డిస్ట్రిక్ట్ రిజర్వ్ గార్డ్), ఎస్టీఎఫ్(స్టేట్ టాస్క్ ఫోర్స్), కోబ్రా, సీఆర్పీఎఫ్ ఆధ్వర్యంలో బలగాలు సంయుక్త ఆపరేషన్కు బయలుదేరి వెళ్లాయి. ఈ క్రమంలో రేఖపల్లి-కోమటపల్లి అడవుల్లో పోలీసులకు, మావోయిస్టులకు మధ్య ఎదురుకాల్పులు చోటుచేసుకున్నాయి. అనంతరం ఘటనా ప్రాంతంలో ముగ్గురు మావోయిస్టుల మృతదేహాలతో పాటు ఎస్ఎల్డీర్ తుపాకీ, ఆయుధాలను స్వాధీనం చేసుకున్నారు. ఎదురుకాల్పుల్లో మరణించిన మావోయిస్టులను గుర్తించే ప్రక్రియ సాగుతున్నట్లు పోలీసు అధికారులు తెలిపారు. ఈ ఘటనను బస్తర్ ఐజీ సుందర్రాజ్.పి ధ్రువీకరించారు.
