Category : | Sub Category : బ్రేకింగ్ వార్తలు Posted on 2024-07-25 09:13:51
TWM NEWS:వాషింగ్టన్: తమ డెమోక్రటిక్ పార్టీతో పాటు దేశాన్ని ఏకతాటిపై నిలపడం కోసమే తాను అధ్యక్ష రేసు నుంచి వైదొలిగానని అమెరికా అధ్యక్షుడు జో బైడెన్ (Joe Biden) వెల్లడించారు. తర్వాత తరానికి బాధ్యతలను అప్పగించడమే మేలైన మార్గమని భావించినట్లు తెలిపారు. అధ్యక్ష ఎన్నికల్లో పోటీ చేయడం లేదని ప్రకటించిన తర్వాత బుధవారం ఆయన తొలిసారి ప్రసంగించారు.
పదవుల కంటే ప్రమాదంలో ఉన్న ప్రజాస్వామ్యాన్ని రక్షించడమే ముఖ్యమంటూ వైదొలగాలన్న తన నిర్ణయాన్ని బైడెన్ సమర్థించుకున్నారు. అమెరికా రాజకీయాల్లో స్పష్టమైన విభజన కనిపిస్తోందని.. దానికి స్వస్తి పలకాల్సిన అవసరం ఉందని నొక్కి చెప్పారు. నియంత, నిరంకుశుల కంటే కూడా దేశం గొప్పదని వ్యాఖ్యానించారు. పరోక్షంగా ట్రంప్ పేరు ప్రస్తావించకుండానే ఆయనపై విమర్శలు గుప్పించారు. ఉపాధ్యక్షురాలు కమలా హారిస్ సమర్థురాలంటూ ఓవల్ ఆఫీసు నుంచి చేసిన ప్రసంగంలో ఆమెను బైడెన్ (Biden) ప్రశంసించారు. ఆమే అధ్యక్ష అభ్యర్థికి తగిన వ్యక్తి అని పునరుద్ఘాటించారు.
సమర్థంగా పనిచేస్తా..
మిగిలి ఉన్న ఆరు నెలల పదవీకాలంలో తాను క్రియాశీలకంగా ఉండబోనంటూ వస్తున్న వార్తలను బైడెన్ (Biden) కొట్టిపారేశారు. తాను అధ్యక్ష హోదాలో ఉన్నంత కాలం తన విధిని సమర్థంగా నిర్వర్తిస్తానని హామీ ఇచ్చారు. సామాన్యులపై ధరల భారాన్ని తగ్గించడం, గర్భవిచ్ఛిత్తి హక్కు సహా ప్రజల స్వేచ్ఛను కాపాడతానని తెలిపారు.
అవన్నీ వదంతులు..
బైడెన్ ఆరోగ్యం మరింత క్షీణించిందంటూ వస్తున్న వార్తలను వైట్ హౌస్ ఖండించింది. కావాలనే ఇలాంటి వదంతులను వ్యాప్తి చేస్తున్నారని మండిపడింది. ఆయన ఆరోగ్య సమస్యల కారణంగా అధ్యక్ష రేసు నుంచి తప్పుకోలేదని స్పష్టం చేసింది.
