Category : | Sub Category : క్రీడా Posted on 2024-07-18 09:48:33
సోషల్ మీడియాలో తనపై వచ్చిన విమర్శలకు వివరణ ఇచ్చాడు జయదేవ్ ఉనద్కత్..
ఇంటర్నెట్ డెస్క్ : టీమ్ ఇండియా బౌలర్ జయదేవ్ ఉనద్కత్ సోషల్ మీడియాలో తనపై వస్తున్న ట్రోలింగ్పై సమాధానం ఇచ్చాడు. యూకేలో కౌంటి క్రికెట్ ఆడుతున్నప్పుడు వంట చేసుకునేవాడినని దుస్తులు ఉతుక్కునేవాడినని ఓ ఇంటర్వూలో చెప్పాడు. దీనిపై ఓ ఎక్స్(ట్విటర్) యూజర్ స్పందిస్తూ యూకేలో కారు, ఇల్లు లాంటి విలాసవంతమైన సౌకర్యాలు పొందుతూ...వాటిని తక్కువ చేస్తూ ఇలా మాట్లాడటం ఏంటని ప్రశ్నించాడు. దీనిపై ఉనద్కత్ వివరణ ఇచ్చాడు. ఇంటర్వ్యూలో తాను చెప్పిన దాంట్లో కొంత భాగాన్నే తీసుకుని అతడు ఇలా విమర్శలు చేశాడని అభ్యంతరం వ్యక్తం చేశాడు.
ఆటగాళ్లు తమ పనులను తామే స్వయంగా చేసుకోవాలని చెప్పానని.. ఆ విషయాలను ఆ నెటిజన్ విస్మరించాడని ఉనద్కత్ పేర్కొన్నాడు. ఒకసారి తాను చెప్పిన విషయాలను పూర్తిగా వినాలని కోరాడు. తాను భారత్లో ఉన్నప్పుడూ వంట చేసుకుంటానని.. దుస్తులు ఉతుక్కుంటానని వివరించాడు. తాను ఎక్కడ ఆడినా ఆటకే ఎక్కువ ప్రాధాన్యం ఇస్తానని పేర్కొన్నాడు.ఉనద్కత్ వచ్చే నెల కౌంటీ క్రికెట్లో సస్సెక్స్ జట్టుకు ఆడనున్నాడు. గత ఏడాది ఆ జట్టు తరఫున కొన్ని మ్యాచ్లు ఆడాడు.
