Category : నేర | Sub Category : జాతీయ Posted on 2024-11-18 11:56:47
TWM News:-రోడ్డు ప్రమాదంలో ముగ్గురు బాలురు మృతి చెందిన విషాద ఘటన ప్రకాశం జిల్లా ఒంగోలులోని కొత్తపట్నం రోడ్డులో ఆదివారం చోటుచేసుకుంది.
ఒంగోలు నేరవిభాగం, న్యూస్టుడే: రోడ్డు ప్రమాదంలో ముగ్గురు బాలురు మృతి చెందిన విషాద ఘటన ప్రకాశం జిల్లా ఒంగోలులోని కొత్తపట్నం రోడ్డులో ఆదివారం చోటుచేసుకుంది. కొప్పోలు దళితవాడకు చెందిన వడ్డే కోటేశ్వరమ్మ కుమారులు వికాస్ (14), అశ్వినీ కుమార్ (12), కన్నెదారి బుజ్జి కుమారుడు రేష్మంత్ (17) ఆదివారం మధ్యాహ్నం ద్విచక్ర వాహనంపై ఒంగోలుకు వెళ్లి, తిరిగి వస్తున్నారు. వారికి ముందుగా వెళ్తున్న నీళ్ల ట్యాంకర్ డ్రైవర్ రహదారిపై ఉన్న గుంతను తప్పించబోయి ఎడమ వైపునకు తిప్పాడు. ఆ పక్కనే వస్తున్న స్కూటీని ట్యాంకర్ బలంగా తాకడంతో ముగ్గురు బాలురు కిందపడ్డారు. వారి పైనుంచి ట్యాంకర్ వెళ్లడంతో సంఘటనా స్థలంలోనే రేష్మంత్ దుర్మరణం చెందాడు. వికాసు వైద్యశాలకు తరలిస్తుండగా మార్గమధ్యలో ప్రాణాలు వదిలాడు. అతని తమ్ముడు అశ్వినీ కుమార్ ఆస్పత్రిలో చికిత్స పొందుతూ మృత్యువాత పడ్డాడు. వీరిద్దరి తండ్రి ఏడాది కిందట మృతి చెందారు. చిన్నారుల మృతిలో కుటుంబీకులు శోక సంద్రంలో మునిగిపోయారు.
