దేవీపై పొగ‌డ్త‌ల వ‌ర్షం

Category : సినిమా | Sub Category : సినిమా Posted on 2024-11-18 11:34:39

ఒక‌ప్పుడు సూప‌ర్ హిట్ సాంగ్స్, అదిరిపోయే బీజీఎంతో భారీ క్రేజ్ సంపాదించుకున్న మ్యూజిక్ డైరెక్ట‌ర్ దేవీ శ్రీ ప్ర‌సాద్. అత‌నికి మ్యూజిక్ బాధ్య‌త‌లు అప్ప‌గిస్తే డైరెక్ట‌ర్, నిర్మాత‌లు ఎలాంటి టెన్ష‌న్ లేకుండా ప్ర‌శాంతంగా ఉండొచ్చ‌ని పేరు కూడా తెచ్చుకున్నాడు. కానీ గ‌త కొంత కాలంగా దేవీ నుంచి త‌న స్థాయి సంగీతం రావ‌డం లేదనేది మాత్రం వాస్త‌వం. మ‌ధ్యలో అప్పుడప్పుడు పుష్ప లాంటి సినిమాల‌తో త‌న‌దైన మెరుపులు మెరిపిస్తున్నాడు కానీ పుష్ప‌2 సినిమాకు త‌న‌తో కాకుండా వేరే వారితో సుకుమార్ బ్యాక్ గ్రౌండ్ స్కోర్ చేయిస్తున్నాడ‌నే మాట విని ఇక దేవీ ప‌ని అయిపోయింద‌ని అంద‌రూ అనుకున్నారు. ఇలాంటి టైమ్ లో సూర్యతో దేవీశ్రీ చేసిన కంగు సినిమాకు దేవీ నుంచి అదిరిపోయే అవుట్‌పుట్ వ‌స్తుంద‌ని అంద‌రూ ఆశించారు. కానీ కంగువ రిలీజ‌య్యాక అంద‌రి ఆశ‌లు నిరాశగానే మిగిలాయి. కంగువ సినిమా విష‌యంలో డైరెక్ట‌ర్ శివ త‌ర్వాత ఎక్కువ నెగిటివిటీ వ‌చ్చింది దేవీ నేప‌థ్య సంగీతానికే. ఇంత‌లా విమ‌ర్శ‌లు ఎదుర్కొన్న ఒక్క రోజులోనే దేవికి ప్ర‌శంస‌లు కూడా ద‌క్కుతుండ‌టం విశేషం. అత‌ను సంగీతం అందించిన కుబేర సినిమా టీజ‌ర్ తాజాగా రిలీజైంది. ఈ సినిమా టీజ‌ర్ తోనే క‌మ్ముల పెద్ద షాకిచ్చాడు. ఈ టీజ‌ర్లో విజువల్స్ ను మించి హైలైట్ అయింది బ్యాక్ గ్రౌండ్ స్కోరే. అంద‌రూ దీని గురించి పాజిటివ్ గా మాట్లాడుతున్నారు. కంగువ విష‌యంలో మొన్న‌టివ‌ర‌కు తిట్లు తిన్న దేవీ ఒక్క‌రోజులోనే దాన్ని పొగ‌డ్త‌లుగా మార్చుకున్నాడు.