Category : సినిమా | Sub Category : సినిమా Posted on 2024-09-27 13:03:00

షారుక్ కొట్టాడు హిట్టు.. రణ్‌బీర్ కూడా కొట్టాడు హిట్టు.. మరి నువ్వెప్పుడు కొడతావ్ భాయ్ హిట్టు అని అడుగుతున్నారు బాలీవుడ్‌లో ఓ బడా హీరోను ఆయన అభిమానులు. ఒకప్పుడు బాక్సాఫీస్ తాట తీసిన ఆ హీరో.. కొన్నేళ్ళుగా బాగా సైలెంట్ అయిపోయాడు. అందుకే తన వైలెంట్ యాక్షన్ చూపించడానికి రెడీ అవుతున్నాడు. మరి కమ్ బ్యాక్ కోసం ట్రై చేస్తున్న ఆ స్టార్ హీరో ఎవరు..?ఎంత పెద్ద హీరోకైనా హిట్ కంపల్సరీ.. వరసగా రెండు మూడు ఫ్లాపులు పడ్డాయంటే తంటాలు తప్పవు. బాలీవుడ్‌లోనూ అయితే మరీనూ..! పాన్ ఇండియా మొదలయ్యాక.. సవితి పోరులా మారిపోయారు మన హీరోలు. ఇప్పటికే ప్రభాస్‌ ఖాన్స్‌కు చుక్కలు చూపిస్తున్నారు.బన్నీ, తారక్, చరణ్ నెక్ట్స్ రెడీ అవుతున్నారు. అందుకే సర్వైవల్ భయం మొదలైందక్కడ. కొన్నేళ్లుగా బాలీవుడ్ హీరోలకు సరైన హిట్లు లేవు. అందుకే ఐదేళ్ళ గ్యాప్ తీసుకుని పఠాన్, జవాన్‌తో బౌన్స్ బ్యాక్ అయ్యారు షారుక్ ఖాన్.అలాగే రణ్‌బీర్ కపూర్ కూడా యానిమల్‌తో హిట్ ఇచ్చారు. అమీర్ ఖాన్, సల్మాన్ ఖాన్‌కు ఈ కష్టాలు కంటిన్యూ అవుతున్నాయి. షారుక్ మాదిరే సల్మాన్ కూడా బ్రేక్ తీసుకుని సాలిడ్ సినిమాలతో వస్తున్నారు. సల్మాన్‌కు కొన్నేళ్లుగా సరైన హిట్ లేదు.ప్రస్తుతం మురుగదాస్‌తో సికిందర్‌లో నటిస్తున్నారీయన. రష్మిక మందన్న ఇందులో హీరోయిన్. షారుక్, రణ్‌బీర్ కమ్ బ్యాక్‌కు హెల్ప్ చేసింది అట్లీ, సందీప్ వంగా లాంటి దక్షిణాది దర్శకులే. తనకు కూడా మురుగదాస్ ఆ హిట్ వస్తుందని నమ్ముతున్నారు కండల వీరుడు. ఈద్ 2025కి సికిందర్ రానుంది. చూడాలిక.. ఏం జరుగుతుందో..?